بقلم : اياد السماوي …
كلش مسيطر بالقضاء وبالداخلية ومحد يگدر يندگ بيه ، وأي واحد يندگ بيه رأسا يصدر أمر قبض وتحرّي بحقه .. أعرف أنتم هسه تگولون منو بوية هذا سبع السبمبع الي الدنيا كلها تخاف منه ومسيطر على القضاء وعلى الداخلية اثنينهم وما أدري بعد علن منو مسيطر هذا البعبع الجديد ؟؟؟
هذا أبو كرش ( زيودي الطالقاني ) النسخة المعدّلة من نسخة المسخ ( مصطفى الكاظمي ) ، زيودي أبو كرش قبل أيام رايح للقضاء بالنجف مسوي دعوى على ثمانية أشخاص ومصدر عليهم أوامر قبض وتحرّي على بيوتهم ، يابه ليش وشنو المشكلة ، أكو گروب خاص على الوتساب صاير بيه حوار عن مركز الرافدين للحوار ، ومطروحة آراء عن المركز وعلاقاته وتمويله وعلاقته بتشرين ، واحد من الموجودين جاسوس گايم مسكرن كل هذا الحوار وباعثه لبو كرش ، أبو كرش ركض بيها للقضاء وأصدر ثمانية أوامر قبض وتحري على هذولة الي متحدثين عن المركز ، ومن يروح أحد المحامين عن هذولة يريد يفتهم شنو الفلم يگولوله هذا عمي ما نگدر نندگ بيه ، عمي هذا القضاء كله والداخليه كلها تحت سيطرته ، يعني فائق زيدان وعبد الأمير الشمري وبعد ما أدري منو كلهم تحت سيطرة زيودي أبو كرش ، هسه أنا خايف لا يطلع زيودي مسيطر حتى على محمدنا ، لأن زيودي مسوي حزب وجاي يصرّح أنه رئيس وزراء العراق القادم .. عمي يالبصري وأنت حيدر حنون ، چا بويه وينكم عن هذا أبو كرش ؟ وعن مصادر أمواله وعقاراته ؟ چا أبو كرش ما تگدرون تسألوه من أين لك هذا ؟ بعدين انت يالقاضي الي أصدرت أمر القبض والتحرّي خذت موافقة رئيس محكمة استئناف النجف لو لا ، وأنت أيضا يا جناب رئيس مجلس القضاء الأعلى تدري بهاي القصّة لو لا ؟؟ ..
